Pa lu mesi di malzu

Pa lu mesi di malzu proverbi vi n'à umbè.
Ogghj cumincemu cun chistu:

Malzu asciuttu, massaiu bruttu
Malzu siccu, massaiu riccu

Massaiu bruttu palchì siddu lu mesi di malzu era asciuttu si pudìa trabaddà lu tarrenu e dapoi si saria accapitatu lu tricu, chi tandu era la ricchesa più manna.

"No si poni resistì"

Pa la dì di Santu 'alintinu una puisia beddissima d'amori e passioni.

Bona lettura e bona festa!

Don Baignu Pes

"No si poni risistì"

No si poni risistì

chisti dui estremi folti:

lu ‘idetti è la me’ molti,

lu no videtti è murì.

Tutt’e dui violenti

sò l’estremi chi descriu

Molgu si t’agghju presenti,

si se’ assenti no viu:

di molti è lu disaffiu

pal parà o pal fugghjì.

Candu no ti ‘icu molgu

d’amurosa simpattia

e candu ti ‘icu tolgu

a punimmi in agunia.

Eu sì chi ti pudìa

in bon’ora cunniscì.

L’occhji toi a lu me’ cori

sò penetranti pugnali;

senz’iddi stocu a tutt’ori

cu una pena multali.

Ca’ di chisti dui mali

agghj’a vulé elegghjì.

Pal finì, gjacchì la molti

incontru in videtti o no

voddu murì middi olti

Basta a videtti però:

chi li to’ bedd’occhji sò

più d’amà che di timì.

No si poni risistì

chisti dui estremi folti:

lu ‘idetti è la me’ molti,

lu no videtti è murì.

"Centu capi, centu barretti"

Chi no semu tutti preccisi ghjà si sa.
Dugnunu la pensa, vesti e credi in modu diffarenti e umbè di olti no si resci a punì daccoldu tutti li capi.
Tandu si dici:
Centu capi, centu barretti!