Ogghj è la dì di Santu Ghjuanni. Primma di tuttu auguri a tutti li Ghjuanni, Ghjuanna, Nanni e Ghjuanneddi :)Cand'erami minori la sera innanzi di Santu Ghjuanni minnanna ci facìa sciuarà un monti chi dapoi la dì infattu primma di scì lu soli dìami scarragghjà; siddu v'aìa calche cosa suttu, frummiculi, babbai, chissa era la doti di lu futuru maritu o mudderi. Siddu no v'aìa nudda, tandu lu sposu sarìa statu poareddu, mischinu. La mattessi cosa si facìa liendi un fioccareddu in una fruedda di trivocia.
La sera si magnàa lu casgiu furriatu e no si bìa. A di notti pa la siti, siddu sunniàami calchiunu dendici a bì, chissu, o calchiunu cu lu stessu nommu, sarìa statu lu futuru maritu o mudderi.
Si facìani li fochi la sera, si brincàani e si facìani cumpari e cummari.
La matinata si magnàani tre chìi d'alba di ruda; dici chi facìa bè pa no timì.
Si facìani òci pa sanà li brusgiaturi e s'accapitàani umbè d'albi.
E umbè e umbè d'alti cosi si facìani la dì di Santu Ghjuanni, ch'era considerata una ciurrata piena di maìa.
E voi cosa v'amminteti?
